朝早？咩對手呀？好呀！九點鐘京士柏配水庫球場見！
英超凌晨快車，令人神志不清，都係做乘客，坐安仔架大霸王穩陣啲！畢業後，各人都投入本身的工作範疇，雖然相聚時間少咗，但友情不變。大隊一行8人，分兩架車，由廣華醫院向京士柏進發！
開波仍在遊車河
預計車程只需10分鐘，沿衞理道兜咗兩轉，搵到曲棍球場、網球場、休憩公園，但硬係搵唔到配水庫，仲嘥咗幾十蚊泊車，點算呢？話九點開波，九點半仲遊緊車河，打電話問對手位置，答案係：「喺車入面，搵緊！」
值得留意，目的地係京士柏配水庫，並非京士柏！咦！架大霸王錶板好似有衞星導航喎，但安仔話香港用唔到，因為太多高樓大廈同玻璃幕牆，阻擋衞星定位嘅效果，一直沉靜嘅粗口琪話：「東京、紐約同香港咪一樣，人哋啲衞星導航勁啲嘅！唔好搵藉口啦香港人。」
搵到啦！原來喺愛民邨山頂，真係人迹罕至呀！但勝在維港全景一覽無遺！快樂非常的一個早上！
馮嘉奇
碩士球員讀萬卷書，親身歷盡各國足球風情。