又到聖誕！又到聖誕！今年去邊度慶祝聖誕節好呢？行街？睇戲？食飯？好冇新意，平時都可以做，邊使等到聖誕節呀！你講咩話？去海洋公園睇冰上滙演同埋玩真雪？上年都有啦，有咩咁特別呀？哈！「海洋公園聖誕全城hohoho2006」就係特別在有奧運選手，以及健力士世界紀錄保持者為你表演冰上絕技。仲可以去愛斯基摩村玩雪、釣魚。想過一個白色聖誕話都冇咁易，唔需要一擲千金去外國喇！
記者︰謝偉文 攝影︰陳陶鈞
Model︰Gary、Yu@PureModel
扮愛斯基摩人
釣膠魚
香港唔會落雪，想過白色聖誕惟有去外國走一轉。咁又未必！海洋公園裏的愛斯基摩村就可以滿足你的願望。呢條村唔係好大，大小只如一個小操場，但鋪滿真雪，堆個小雪人並冇問題。入到呢條村第一時間記住去借件愛斯基摩民族褸，變身做愛斯基摩人，再影張靚相。哈，唔單只可以過白色聖誕，仲連國籍都可以換埋。不過褸的數量有限，大家可能要排隊等一陣。小記問工作人員︰「係人都着那幾件褸，好唔合囗生喎！」工作人員︰「梗唔係啦！有兩批褸日日洗，日日輪流替換，放心！」另外記住一定要試吓釣魚，雖然係假魚（塑膠魚）一條，但就係兒時玩意「上鏈磁石釣魚機」的放大版，原來冰天雪地釣魚，真係「點滴在心頭」。而為了令真雪唔融化，館內會一直保持在4℃，工作人員提醒各位要帶備多件褸入內。
人肉陀螺
一分鐘轉308圈！
載歌載舞的冰上表演欣賞過很多，但載歌載舞之餘仲有魔術表演、雜技以及空中飛人就真係第一次。今年海洋公園從拉斯維加斯請來26位溜冰高手表演，當中包括前奧運溜冰選手的AxelMederic，及1分鐘能轉308個圈的健力士世界紀錄保持者NataliaKanounnikova。Axel︰「今次表演同拉斯維加斯好唔同。今次內容係第一次演出，十分複雜及多樣性！」為了是次演出，他們已經排練了3星期，當中最困難是由於表演台不是真冰製造，而是仿冰的特製膠地板，少了冰屑卡着刀片，很難作急煞車，而且容易失平衡。有觀眾擔心︰「表演台同中學禮堂個台差唔多大，佢哋動作咁大，睇落好危險喎！」溜冰員Brianne︰「No！WearePROFESSIONAL！」
同聖誕大屋爭影相
睇完冰上滙演，再翻轉愛斯基摩村，都好似唔夠喉，梗係啦！聖誕節又點少得影相。靚相熱點包括「聖誕老人屋」同聖誕老人影相，但實在好多人排隊，間屋又鬼咁靚，唔影就笨！屋內隨地都係大糖果、禮物包，隨手執件影相就唔會咁悶啦。仲有隻好可愛的搖搖木馬，坐住影相絕對型爆，但自問有咁上下斤両就唔好試喇！
海洋公園聖誕全城hohoho2006
舉行日期︰2006年12月16日至2007年1月1日
開放時間︰星期一至日上午十時至晚上八時
（12月16日及12月23日由上午十時至下午七時）
入場費︰成人港幣$185；小童（3歲至11歲）港幣$93
（日場門票費用已包括所有海洋公園聖誕全城hohoho之活動及園內所有活動措施）
網上活動資訊︰www.oceanpark.com.hk
查詢熱線︰25520291