樓市死而不僵，再淡靜嘅市況都有炒家搵食，近排的確有唔少成交報告，都係一啲持貨一個月，或者幾個月就轉手賺錢嘅摩貨成交例子。香港置業做咗個統計，12月截至13日，有42宗以確認人身份（即係摩貨）轉讓嘅二手私人住宅成交註冊，比11月同期多咗27%，金額亦大幅上升超過1倍，去到1.69億港銀，當中有11單係樓花轉讓，包括5宗收緊樓嘅將軍澳都會駅，同3宗未有耐入得伙嘅土瓜灣翔龍灣。
除咗揸咗成年、始終都係凶多吉少嘅都會駅樓花摩貨外，翔龍灣喺10月份「賭王」四太梁安琪出貨賺錢嘅效應下，短炒脫手嘅買家都應該有肉食。
再一次印證，想玩摩貨賺錢，尤其係新盤樓花，唔在乎天長地久，最緊要快趣甩手。
港置李志成話，其實11月份整體摩貨成交有87宗，已經比10月份多咗40%。而下半年截至今個月13日，摩貨登記總共有457宗，估計最終有500單左右，即係月底前可能多40幾宗，相信就算唔多得過11月，都可以維持80宗嘅水平。
樓市投訴
買樓是一生重大的投資
若讀者遇上無良奸商、蠱惑經紀，請挺身舉報
蘋果投訴熱線：29290000
傳真：23703886
電郵：[email protected]