恒基地產（012）主席李兆基炒股眼光獨到，跟佢買新股長揸，10次都有9次賺到開行，被坊間封為「順德畢菲特」，但係佢老人家有份攞出嚟上市嘅陽光房地產基金（435），坊間就好似唔係咁受落，喺《公眾投資168綜合論壇》上，就有唔少網民發表佢哋嘅個人意見。
網友kzy話：「恒基又當人儍仔……06年透過資產重估將溢利誇大250%，假若明年樓市跌10%，即引來嚴重盈利倒退，即不能維持8至9%息率。」
另一名網友全職獵人加把嘴話：「其實跌5%已經派唔到息（承諾息率）……佢實際息率好似得2%喎。」網友swell就非常唔畀面咁話：「如果係筍嘢四叔點會放手吖，穿底可期！」
署名hw嘅網友就幫四叔平反：「佢係以折讓20%嘅估值注入資產，原則上，係要個市跌20%先會影響到盈利……計收租物業嘅價值可以有好多方法，精神係willingbuyer，所以如果冇出現大幅度嘅減租，基本上個估值可以保持至少一年。」不過，佢最後補咗一句：「呢隻嘢連主承銷人都唔多出力sell，睇嚟係唔想人攞。」
陽光大sell誠意
睇番陽光嘅招股文件，佢又真係實牙實齒咁用四大招，將佢嘅收益率提高到8.49%至9.01%作招徠，但就搵唔到資產重估令溢利誇大呢一招。陽光招股記者會上，行政總裁吳兆基就大sell誠意，佢話：「成個package係好有誠意，加上暫時冇一隻REITs採用但其實好常見的租金保證。」睇嚟大家仲係覺得誠意唔係好夠。
大華繼顯就講到明，陽光只係適合想要高股息回報嘅投資者，因為睇唔到隻股會有好大上升空間，若果真係要揀隻REIT嚟投資，佢建議揀冠君（2778），話晒資產都好啲！