十二月十日沙田馬場人頭湧湧，入場人數有五萬幾人，投注總額達九億三千萬元，認真唔錯，左丁山入到國泰航空訂咗嘅馬會廂房，見到國泰機艙服務一姐靚女Q，Q姐立即講：「今日有冇必贏貼士？」邊度有呀，有就自己一早發咗達啦。Q姐笑笑口拎出一份電腦下載嘅專欄畀左丁山睇：「嗱，有某專家畀貼士喎？」弊，原來係當日之「GG細語」。Q姐朝朝上網搜查有關國泰嘅報道，日日睇住「GG細語」，左丁山講乜佢都知。呢次面紅咯，俾佢捉到正，如果貼士完全唔準咪好瘀？
國泰一哥總裁P行過嚟打招呼，攝影師要影相，總裁P攞咗Q姐嗰張「GG細語」，對住攝影機同左丁山合照，佢話有圖為證，左丁山吟詩都吟唔甩。總裁P話：「馬場係好公道嘅，董事聽埋晒啲貼士，一樣輸到面青，唔好以為董事特別有靈通消息。」做董事，要付出代價，總裁P身為馬會董事，多入馬場，輸錢機會果然大增，當做多啲善事啦。
好快就跑完九場馬，睇番左丁山喺十二月十日所講嘅四場國際賽貼士，僥倖中咗第八場香港盃，三重彩派一千四百，輸三場，中一場，好彩仲有一餐茶賺到。第五場短途錦標，見到「兼併目標」退出，於是買重七號「精英大師」，點知隻十二號「騏綵」竟然跑出一分零七秒八嘅破紀錄時間贏成三個馬位，快到癲，誠始料所不及。「精英大師」黃金時期都跑唔到呢啲時間，何況今日已經七歲，在傷病之後？服晒，如果「騏綵」能夠保持此狀態，可以做世界短途馬王！
完場後，舉行閉幕儀式，就係警察銀樂隊，風笛隊演奏，一位美國來客喺看台睇到，不禁話：「英國傳統果然深厚，成個亞洲，今日恐怕只有香港先至有咁好嘅風笛隊！」演奏過後萬花筒煙花爆發，馬場上空光輝燦爛，唔少外國人帶埋兒童入場參觀。若謂香港一片昇平景象，莫過於此矣。