最近有調查報告話，𠵱家嘅家長對子女過份保護，事事為佢哋代勞，搞到新一代嘅小朋友無晒自理能力，10歲仔隨時連鞋帶都唔識綁，認真可悲。香港地就係咁奇怪，父母「孝順」仔女嘅個案，永遠多過仔女「孝順」父母，單係講買樓，好多後生仔女都要靠父母畀首期。
香港置業陳子光話，最近有位廿四孝媽咪就幫個準備結婚嘅仔畀首期，買入長沙灣泓景臺6座中層E室一個665呎嘅2房單位，成交價261萬，三成首期即係78.3萬；另外，中原列志揚亦報料，元朗蝶翠峰5座中層F室，633呎，新任業主係一名後生仔，由爸爸畀首期，以單位126.8萬元計，世伯要畀38萬首期。
蘭西開始明白，香港嘅出生率點解會愈嚟愈低，因為萬一個個仔女都要阿爸阿媽畀錢買樓，就真係多多老本都唔夠！