孔敏儀的恨意，令7歲的岑浩賢被斬，一家遭逢巨變，嫲嫲謝惠貞透露賢仔不肯原諒繼母孔敏儀：「我俾人斬喎，都唔知幾痛！」賢仔又說孔敏儀判監，坐得「愈耐愈好！」
嫲嫲昨在區議員陳琬琛及黃家華陪同下，在梨木樹邨的陳琬琛議員辦事處會見傳媒，嫲嫲神色平和，只是提及賢仔受傷治療時，顯得黯然神傷。
孔欲迫賢仔入孤兒院
對於孔敏儀重囚12年，嫲嫲說以平常心面對，尊重法庭判決，認為那是孔敏儀應負的責任，還了賢仔一個公道。她說，曾勸賢仔原諒孔敏儀，但賢仔不肯，仍想孔敏儀被判重囚；嫲嫲又是否原諒孔敏儀？她說收到孔敏儀的求情信後，本想探望對方，但得悉孔敏儀曾吩咐曾可威在車上斬賢仔，便打消念頭。
「我幾晚瞓唔着，發噩夢，夢見漆黑一片，賢仔唔見咗。」嫲嫲說。「我接受唔到佢有悔意。」
對於孔敏儀父親維護女兒，嫲嫲說：「佢唔知孔敏儀點對賢仔！」嫲嫲說孔敏儀嫁給岑偉成後，常迫丈夫將賢仔送入孤兒院，更曾企圖取消賢仔戶籍，但不成功，於是便痛下殺手；至於孔岑兩人的婚姻能否維持，嫲嫲說留待兒子決定，相信他在適當時候會到獄中跟妻子見面，但她不會視孔敏儀為媳婦，也不會探監。
對於賢仔近況，嫲嫲說他生活愉快，跟同學相處融洽，但因手傷影響，揸筷子和筆都不穩，中文較差；賢仔每周要做兩次物理治療，拉手指筋時會痛得叫苦連天；以往賢仔的志願是揸車，但受傷後已沒再說了。
區議員黃家華說資助賢仔的基金已累積45萬元，現時婆孫倆靠基金及積蓄過活，嫲嫲慳儉得很，希望將錢留給賢仔讀大學。
在歷時45分鐘的訪問中，嫲嫲借機向學校老師、社署社工、仁濟醫院骨科、物理治療師及各界人士致謝，又提及特首曾蔭權亦曾兩度致函問候賢仔，促他畀心機讀書，也令賢仔樂上半天。
本報記者