鍾鎮濤（阿B）相隔10年再推出廣東碟，除了找來周杰倫和陳秋霞為他寫歌外，又出動古董樂器錄音，務求令樂迷聽出耳油。談到唱舊情人陳秋霞所作的歌，阿B表示自己也意想不到。
鍾鎮濤將在月內推出新廣東碟《濤出新天》，除了早已派台宣傳的《日日是好日》外，阿B還找來周杰倫和舊情人陳秋霞為他作曲，他還選了周杰倫寫的《魔鬼的情詩》做第二主打，他表示與對方合拍電影《頭文字D》時，因為怕被拒絕，故不敢開口邀周杰倫寫歌，後來有朋友穿針引線才成事。
讚周杰倫快槍手
阿B日前說：「佢嗰陣忙緊拍戲，估唔到一個禮拜內就交到貨，拍戲時我覺得佢除咗寫歌叻外，份人都好聰明，拍戲憑感覺就可以做到導演要求，點知原來佢寫歌仲係快槍手，仲好啱我feel㖭。」
談到舊情人陳秋霞寫了首《意想不到》給他，感覺如何？阿B說：「咁多年朋友，有種舊同學嘅感覺，好有默契。我久不久去大馬做嘢都會約食飯，不過我見佢老公仲多啲。有次佢嚟香港同阿倫（譚詠麟）拍MV，大家講開電話，佢話寫咗好多歌，好似黃家強同阿倫都有唱佢嘅歌，於是就約定佢寫番首歌畀我，其實今日我會唱佢嘅歌，真係意想不到。」
現今唱片市道不濟，阿B表示原本有出版社找他出自傳，但他覺得沒有其他方法比把心聲寫進歌內更能表達自己，他說：「有啲嘢唔講得，有啲嘢又唔想再提起，暫時唔考慮出書住。我最叻都係音樂，想做張後生仔唔覺老套，大家都鍾意嘅唱片，尤其畀啲唔download嘅樂迷聽，所以我錄音唔用電腦，全部彈真樂器，有80%嘅樂器都係古董㖭。」
叼雪茄食大眼雞
此外，在剛過去的周日凌晨1時多，阿B和三名男性友人到灣仔潮州村食肆打冷，四人大啖鵝片和大眼雞等，邊吃邊隊啤講男人經。見阿B幾杯下肚後情緒高漲，笑容滿面，其後大夥兒埋單離開，口叼雪茄的阿B駕着吉普車在中環放低友人後，即返回其麥當奴道寓所。
採訪：蔡如玉
攝影：陳俊強、娛樂突發組
