溫拿將於農曆年踏紅館舉行演唱會，前晚五子登上洋紫荊號拍攝無綫音樂特輯《溫拿狂想33》，遊維港之餘更搭正8時捕捉激光滙演的繁華景象作背景錄影三首金曲，節目將於本月30日播映。
溫拿五虎前晚請來陳潔靈、葉振棠及音樂人鍾定一擔任音樂特輯《溫拿狂想33》的嘉賓，眾人登上洋紫荊號拍攝，由於風浪不算大，故拍攝順利。阿倫說：「我上年拍自己嘅音樂特輯，申請喺貨櫃船表演，請埋幾百個歌迷一齊嚟，點知話唔符合消防條例，唔畀拍，於是漏夜將個台搬去無綫個廠拍，今次冇得頂啦，個mood好靚，晏晝我哋仲去咗『聖地』。」
着紅底褲錄影
阿倫口中所謂的聖地其實是灣仔分域街一帶，他解釋：「嗰度好多酒吧，係樂壇聖地，好多歌手都喺嗰度出嚟，個個都着住條紅褲仔㗎，我今日都有着，係內膽紅。」問到會否請另一半現身？阿B在旁表示：「我為咗拍呢個特輯搞到身邊一個少女好傷心，我細女過兩日喺學校表演，我去唔到呀，惟有叫人錄低再睇，佢哋唔係藝人，唔會叫佢上鏡。」在旁的阿倫則謂：「係啦，對小朋友唔好，要保障佢哋安全。」阿B即笑謂：「咁我安全啲。」
讚志偉大個仔
談到曾志偉表示願為東華當晚失言向鄭希怡（Yumiko）道歉，阿倫謂：「咁就真係覺悟，知道錯咪好囉，順從民意。」至於志偉歸咎拍檔司儀薛家燕不懂執生，他就說：「仲話家燕姐笑到粒癦都歪埋，件事應告一段落，Yumiko係女仔，心靈都受創啦。」之後阿倫突然問記者志偉是否真心認錯，然後又說：「係就好啦，起碼佢知底線喺邊，大個仔喇。」
採訪：駱華齡
攝影：仇志德
