車、阿激戰過咗4日，但兩隊波好似叫極唔願停，阿仙奴領隊雲格出嚟寸爆車路士班主阿巴莫域治同前鋒舒夫真高，暗示前者買人經常貨不對辦，又明示「軍刀」係一部撞爛咗嘅法拉利！法國人雲格喺英國咁多年，果然學足英國人咁話中有話，求大俠實在佩服佩服！
鬧富豪搞垮球壇
兵工廠主帥雲格平日好少撩起火頭，但佢日前都忍唔住潤吓「軍刀」：「有時你好貴咁買架超級跑車法拉利返嚟，佢行得好哋哋就話，但阿巴莫域治買嗰架就已經一分為二咯！」佢順水推舟咁講埋阿巴莫域治：「搞波係需要耐性嘅，學懂箇中玄機，唔係淨係識不斷買球星就得！」
雲格以球壇殿堂人物嘅身份作出警告：「𠵱家咁多富豪注資入球壇，隨時會搞垮足球，因為呢啲資金幾乎會凌駕球會嘅正常收入，冇富豪注資嘅球會根本冇得鬥，而且球員薪酬亦會慢慢超過市場嘅正常水位；其實，嗰啲富豪只係想利用球會賺快錢，根本冇諗過足球嘅長遠發展！」
此外，車仔中場林柏特就怒斥兵工廠門將列文無禮貌：「有日我同列納（前利物浦球星，做緊講波佬）喺倫敦一間餐廳食飯，列文就坐喺對面張枱，佢不單止扮見唔到我哋，走嗰陣仲特登喺我哋身邊經過，連一句hi都唔講就走！」求大俠勸列文想搞好啲人際關係，下次唔好喇！
「阿仙奴作客車仔拎到1分，雲格開心都嚟唔切，『軍刀』呢壇嘢俾佢擺上枱，惟有怪自己唔爭氣，有痛腳俾人捉住啦！」