噚日，曾淵滄兄話：「和黃股價近日走勢很飄忽……老是一天升一天跌，真不容易捉摸。」小弟一睇到呢個見解，非常同意。無辦法，有呢個現象係因為，一路以來被譽為和黃絆腳石嘅3G業務，進行文化大革命，將營運模式、服務收費方法完全改變。雖然，我已經多次講過對今次改革嘅信心，不會因為市場仲未肯定今次改革會否成功，所以和黃走勢就會好飄忽。
仲有，近幾年和黃每逢接近年中、年尾嘅時間，都會因為想粉飾中期或全年業績而賣「家當」。今年5月試過出售碼頭業務，現在市場就估究竟除咗Priceline.com之外，仲有冇其他賣「家當」行動。市場一路都有傳聞，和黃會投降，將3G業務旗艦英國3UK出售。呢個傳聞我覺得好難相信，唔係因為和黃有甚麼情意結，而係因為冇人可以出一個能夠滿足和黃（同我）嘅價。
不過，我相信和黃絕對有可能出售電訊業務，之不過唔係英國業務，而係和黃佔有五成股權嘅和記電訊旗下嘅印度2G電訊業務。呢幾日，《華爾街日報》、《金融時報》都紛紛傳出和電想賣印度業務嘅消息。大家都知道，和黃管理層作為理性生意人，真係乜都可以賣，最緊要係作價。
《華爾街日報》就報道話，有人出價80億美元買和電印度業務嘅股權，《金融時報》仲誇張，話有人出價140億美元，即係差唔多1100億港元。如果我冇計錯，和電將出售收益攞嚟派息，和黃就可以進賬550億港元。始終80億同140億美元分別好大，大家如果有跟住我嘅建議買咗和黃，就一定要忍耐和黃股價可能會有比較大嘅波幅。
哈企來港商機無限
呢幾日，特區金融業吹咗好多從哈薩克斯坦Kazakhstan嚟嘅風，話希望特區可以提供金融服務畀哈國啲企業。呢個消息，對於我呢個前石油分析員來講非常鼓舞，因為哈國「寸油尺土」，肯定為我哋帶來無限商機。就連港交所周文耀，都話希望可以喺08年見到有哈國企業來港上市。
不過，我再諗深一層，某個國家嘅企業想來港上市，使唔使出到港交所高層，好似「計劃經濟」咁話「希望見到」？不過最終，我都接受哈國企業來港上市，係一定需要港交所高層嘅「祝福」。無他嘅，大家可以試吓問問喺我哋特區做企業融資嘅banker們，如果無端端攞一份哈國企業嘅上市申請去有關部門申請上市，一定會被證監會同港交所係咁叉、叉、叉。因為證監會同港交所裏面啲官員，最怕就係孭鑊，只要冇公司可以成功上市，佢哋就唔會有鑊孭。近期一大班分分鐘會出事嘅祖國銀行點解可以上市？上市係國家政策，就算出事，又點會輪到特區啲小官員孭鑊？
不過最後，就算冇啲驚孭鑊嘅官員，都未必有哈國企業來港上市。因為要我哋特區啲嬌生慣養嘅投資銀行家，去好似哈國呢啲渺無人煙嘅地方，真係好難。大家只要睇下班要跑大陸投資銀行家、會計師、顧問等等嘅blog，就知道點解。