俗語有云，人怕出名豬怕肥，華華記得，賣電器賣到變成中國首富嘅國美電器（493）主席黃光裕，曾經講過類似嘅說話。唔知係咪呢個原因，最近一個月華華都經常見到好多關於佢嘅新聞，噚日又見到「信用卡虛假消費套現在國美暢通無阻」嘅新聞。
內地報章《東方早報》報道，話有讀者報料，有「非法中介」駐紮國美同永樂等電器舖，幫人用信用卡做虛假消費套現金，之後過水濕腳坐收巨額佣金。佢哋重派卧底記者去到國美中山公園分店放蛇，發現真係「暢通無阻」！店員完全無過問。
可能香港讀者對信用卡套現唔係好熟悉，等華華解釋吓。所謂套現，就係指信用卡持有人同商戶串通，利用虛假交易及銀行透支資金嘅免息期，雖然要「支付」套現金額約20%作佣金，但係由於啲人急於周轉，所以無計，好多人重會走數㖭！
咁國美又點講呢？國美上海總經理宋林林話，佢哋經已報咗警，重強調集團絕對無參與信用卡套現嘅勾當，從來都無只提供貨單而唔出貨嘅情形。佢承認，中行、建行、招行、民生同廣發行都有嚟查過，但已確認國美嘅分期付款流程無問題。睇嚟，今次呢個古仔唔會咁快散場。