楊怡在《賭場風雲》中飾演隆胸少女，由原來31A變成36D豐滿上圍，問「隆胸」滋味如何時，她表示每天要孭兩磅膠在心口，感覺沉重之餘，更令她腰痠背痛，加上拍攝時正值炎夏，弄得她的胸圍完全濕透，認真慘情！
在無綫近日播出的劇集《賭場風雲》中，楊怡飾演不甘於平凡而隆胸參加選美的少女譚美珠，談到早前拍攝期間裝「胸」作勢的日子，楊怡可謂有苦自己知。
不能承受的重
楊怡日前接受訪問時說：「劇入面我隆胸隆到36D，拍嘅時候要加兩嚿膠喺心口，日日孭住呢兩磅嘢真係好重，條腰骨仲好痛，惟有頻頻做按摩紓緩痛楚。加上拍嘅時候係夏天，又熱又焗，每次拍完成個bra都濕晒，真係誇張！」問楊怡在劇中會否效法樂基兒拆彈，她笑言要賣關子，又叮囑觀眾繼續留意劇情發展。
楊怡飾演的譚美珠除隆胸外，還有黐脷筋毛病，她表示這特徵是她主動向監製提出，楊怡說：「譚美珠呢個女仔，成日覺得自己好靚，一心諗住釣金龜婿，但佢內心其實幾單純。我覺得佢外表既然咁完美，不如畀小小缺憾佢，所以同監製商量，好唔好加埋黐脷筋呢個元素，結果監製覺得都OK！」
入圍已覺開心
在芸芸無綫藝員當中，楊怡的演技早已備受矚目，未知她可曾希望進一步得到認同，在無綫台慶頒獎禮中獲取獎項，如最佳女主角之類，楊怡笑說：「對於我嚟講有得提名同埋入到五強已經好開心，咁當然我會繼續努力啦！」
採訪：戴彩煥、馮美茵
攝影：仇志德
服裝：MarcbyMarcJacobs
