信和置業上個月尾以19.4億元高價投得九龍塘廣播道地皮，樓面呎價9868元，預計建成後，每平方呎至少賣萬五至萬六元，消息理應利好樓市，但有網民擔心會出現97年大跌市翻版。
冇追擊冇董建華不怕重演
mousehunter喺《香港討論區》入面發表咗個題目：「大鑊，好似97咁，股巿位高勢危，信和天價投地，pattern一模一樣，97小西灣地王，當年由信和以過百億元投得，即後來嘅藍灣半島，唔怪得人哋話：『牛頭角順嫂都買股票時，股巿即將爆破；樓巿信和都入巿時，樓巿……』」
雖然有人覺得𠵱家嘅環境似足97翻版，不過賣地後至今，豪宅呎價仲係有升冇跌，好似賣地後山頂倚巒連環錄得兩宗孖屋成交，涉及6.2億元，呎價3.65萬創山頂新高。啲買家真金白銀攞去買豪宅，似乎唔信樓市已見頂喎。
所以樂觀網民對後市仍有信心，fishfish話：「既然大家都仲記得97，又點會咁易再發生呢？」creamo補充都係覺得唔會有事：「當年有亞洲金融風暴呀嘛！今次都冇國家貨幣被追擊！」horsehung就話：「當年有董建華至真！」