12月3日，股壇長毛DavidWebb向散戶派聖誕禮物，推介順龍（361），跟住隻股火箭式飆三成六，你都咪話唔盞鬼。不過，有散戶投訴，話阿Webb一早就密密收集，持有1820.6萬股，佢先至真正係收聖誕禮物嗰個肥仔。計華華話，有錢大家搵囉，又使乜勞氣？
持有新確直插水
又有散戶話，不如自己去摷吓阿Webb大手揸乜，早着先機仲實際。如果你真係咁諗，華華就惟有祝君好運喇。
話說有隻股，阿Webb大手持有，但佢老人家咁多年嚟一隻字都冇提過。呢隻喺乜？咪就係做電話嘅新確科技（1063）。呢隻股連年插水不在話下，前日仲公布以大折讓價0.3元供股，噚日急挫41%，收0.48元，再創新低。
阿Webb都有坐艇時，大家都係等佢畀貼士先入市啦，免得輸錢又唔知去邊度搵人賴啦！