鄭希怡（Yumiko）日前在無綫籌款節目《歡樂滿東華》中表演空中飛人時，不慎被錢嘉樂扯甩褲露出T-back，除有約161萬觀眾在電視上直擊其洩春光過程外，該片段更經由YouTube在全球廣泛流傳，但網站昨日已在無綫要求下刪除短片。至於Yumiko昨日現身公開活動時，不但力壓英皇一姐容祖兒企中間位，更透露曾在家中重溫甩褲晒月光的片段。
鄭希怡上周六在《歡樂滿東華2006》直播的空中飛人環節中意外甩褲，據無綫昨日公布的收視報告，該環節有25點收視，即約有161萬觀眾直擊Yumiko甩褲過程，而該片段被網友上載到YouTube網站後，前日旋即成為單日全球點擊次數最多的短片，昨日單日瀏覽人次更逾百萬。無綫昨日即採取行動，向YouTube禁制播映，故所有甩褲片均被鏟走。
搶盡風頭
影大合照企中間位
至於Yumiko昨日已復工，現身尖沙嘴出席英皇娛樂台啓播禮，席間她與關智斌扮整餅廚師，與吳浩康及SunBoyz等齊送巨型蛋糕賀開台。現場見Yumiko表現投入，心情似已平復。成為全場風頭躉的她，拍攝大合照時更力壓英皇一姐容祖兒、林子祥、黃耀明、Twins和謝霆鋒等企中間。
Yumiko事後接受訪問時說：「噚日休息咗一日，之前原本心情都OK，不過之後見到啲相，跟住又知道有人將段片放上網，仲有屋企人打畀我，所以先要休息。」對於不少人批評曾志偉當晚的「slowmotion重睇」言論過火，Yumiko說：「冇嬲佢，佢都係做番主持人嘅身份，盡咗佢嘅責任令氣氛冇咁僵。」有否覺得志偉「踩多腳」？她說：「唔想咁諗佢。」
對於自己的甩褲片榮升YouTube單日全球點擊第一位，Yumiko苦笑說：「有少少唔開心，但都冇辦法，佢哋又唔係偷拍，係喺電視度攞出嚟，我都控制唔到，有人同我講叫我唔好睇，我自己有錄低，我返屋企都有睇番，我覺得應該係要面對，唔可以驚，其實最難過係發生事當晚，成晚都瞓唔着，因為唔知第日啲報道係點，好想去買報紙，但屋外又有好多架車等自己，不過𠵱家真係OK，冇乜嘢。」
對於錢嘉樂「冇人要你我要你」的諾言，Yumiko笑說：「好多謝佢咁大犧牲，不過我真係冇怪佢同嬲佢。」因甩褲事件致知名度大增，是否覺得是塞翁失馬？Yumiko坦言：「我唔覺得係咁，如果係咁我寧願件事冇發生過。」不過她強調日後若再有同類表演，她絕不會有陰影，會照做。
無綫的《東張西望》昨日重播Yumiko在《東華》中的片段，發生甩褲意外後，她爬回棚架即攬着有份表演的AmandaStrang激動痛哭，鏡頭中可見Yumiko哭得相當淒厲，事後她接受無綫獨家訪問時說：「嗰時真係好激動，一來完成唔到動作，意外對我嚟講唔知點面對，但𠵱家已經平復好多，事後收到好多短訊同電話，好多謝大家支持同關心，亦都好感動嘅係當時全班隊員都留喺台度安慰我。」
高層護花
海外版本剪露股片
另一方面，無綫總經理陳志雲昨日接受商台節目錄音訪問時，力斥網民將甩褲片上載是非法行為，他說：「我哋原裝版本會cut咗嗰段，就連海外平台播放都會剪埋，至於網上片段，我哋會向有關方面反映要求刪除。」
無綫昨日公布上周收視，上周六晚直播的籌款節目《歡樂滿東華2006》平均收視25點，即約有161萬觀眾收看，至於最高收視項目則是Twins表演的「沙煲姊妹起勢KICK」，有26點收視，即約有167萬觀眾收看。此外，汪明荃昨日在黃埔出席手錶活動，對Yumiko被扯甩褲一事，她說：「今次純粹意外，佢身材咁靚，冇乜咁大傷害。」
採訪：胡比、馬建華、駱華齡
攝影：陳順禎
