奕達國際嘅主席林志豪，噚日好似執到寶咁宣布，獨家生產由台資IT企業磐石集團設計、全球首創嘅「雙介面」記憶卡「轉接器」，更揚言未來可以取代𠵱家USB手指每年銷售10萬件嘅市場。
林志豪話，手機用嘅記憶卡，無論係SONYMiniPuo或MicroSD等卡，都唔可以用喺數碼相機，要將相或video入電腦，一定要用cardreader，非常麻煩。佢哋呢個專利產品，讀到兼可收納「卡仔」，直接插USB槽又得，一物三用，相信會受歡迎。佢哋先試產20萬件測試市場，最快明年3月付運，主要銷售對象係MP3同手機廠家，零售價約10至15蚊美金，但冇講毛利率有幾多。
佢強調行內估計明年整體記憶卡銷約10億件，佢哋只賣一款轉駁器，儲data要另買卡仔，唔會構成競爭，反而係有福同享，如果屆時奕達可佔5%份額，條數都好襟計喎。
真係咁「好景」？其實喺電腦商場買張1GB嘅卡仔，都唔使二三百蚊，雜嘜讀卡器隨時50蚊有找，奕達單係轉駁器，至少都要70幾蚊港紙，華華就唔多睇好。