周中喺歐冠盃「出事」嘅球隊中，本周返到聯賽幾乎全部「反底」，好似國米、皇馬、里昂同利物浦等，偏偏意甲勁旅AC米蘭繼續頹勢，於周日主場0:0同拖連奴握手言和；而AC中鋒基拿甸奴12碼「宴客」，令佢哋保唔住1.35倍熱W……如數近期最令人失望球隊真係非AC莫屬啦！
「基奴」爭射12碼敗家
AC近7場聯賽只贏過一次，狀態差到冇人有，聯賽對上一次「讓球主客和」贏盤，更係9月中嘅陳年往事！周日面對喜歡死守嘅拖連奴，主帥安察洛堤罕有地派出3前鋒基拿甸奴、波里路同列卡度奧利華拉（簡稱：奧利華拉）攻堅，望靠強攻爭勝穩一穩帥位，點知成場「屈機」都苦無機會。戰至79分鐘，AC博到12碼，基奴手指篤篤話自己信心爆棚爭射，好衰唔衰怒抽中柱，球迷睇到跳晒起身，安帥就冇眼睇！如果唔係對方前鋒梅斯完場前先頂中楣後射中柱，AC甚至輸埋。
查實，AC今季都算黑到出汁，守將輪流養傷，五行欠「運」，據講今季已經15次中柱或者中楣。前鋒基拿甸奴聯賽只係入咗兩粒、奧利華拉又懶「勁」咁瞄住啲柱楣嚟射；AC𠵱家暫列聯賽15位，15場入得14球，毫無班霸本色，奪標倍率冷到750倍，𠺢陣安察洛堤真係有得震冇得瞓，唔知佢有冇諗過同祖記一齊降班日子會唔會好過啲呢？
「睇嚟安察洛堤都係時候同AC講拜拜，但以現時成績嚟講，真係神仙都難救，求大俠敢寫包單邊個上馬死邊個！」