喺內地投資咗2億美元（約16億港元）嘅羅兵咸永道會計師行，呢幾年隨住H股來港上市，接job都接到手軟，𠵱家喺中港澳三地已有7800個員工，合夥人亦有270個，生意愈做愈勁，好消息亦接踵而來。
繼續揼錢入中國
該行噚日宣布，被有18年歷史、團體會員達5000家嘅中國註冊會計師協會，評為中國第一，呢個殊榮佢哋已經冧莊咗3屆，即使今年大會嘗試新玩法，首次計埋年度業務收入、會計師人數、培訓完成率、領軍人才後備之選人數（高層跳槽都可穩定局勢嘛），以及受罰或遭到懲戒等因素，但冠軍……都係一樣。
羅兵咸嘅中國主管合夥人林怡仲話，未來會繼續揼多5000萬至1億美金咁話，增加對中國市場嘅投入喎。