隨着今年越南成功加入世貿組織（WTO），經濟地位今非昔比，搖身一變成為投資者嘅「淘金地」，而散戶豈會放過任何搵錢機會，喺香港上市嘅越南概念股，近期已成為熱炒對象！
基金尚未成形
好多網友都同意，越南市場好好景，喺《香港討論區》內研究有關越南基金嘅投資機會，網友yshappy率先發問：「有冇越南基金？如有，有冇好介紹？」
網友Lscat回應：「越南市場𠵱家大極有限，唔會有基金專門投資呢個國家。」網友peterpan6644亦提醒：「越南股票不過100隻，成交低，要諗清楚！」
事實上，喺香港可以買到嘅越南基金少之又少，可謂供不應求，怡富資產管理上月27日推出一隻投資越南股票嘅新基金，入場費2000美元（約1.5萬港元），推出首日即告爆額。根據東驥基金管理資料顯示，除上述怡富基金外，在香港可以買到嘅只有德銀及保誠嘅越南相關基金，但投資額最少10萬美元，而呢兩隻基金仲未被證監會認可。
越南已成為今年亞洲市場焦點，佢哋嘅股票市場今年以嚟升幅超過八成，升幅喺區內排名首位，機構性投資者及基金經理皆積極物色當地投資機會，相信不久將來，會愈來愈多越南相關投資產品推出，散戶要畀多一啲耐性。