炒消息從來都係大小戶所愛，好似打正旗號話要進軍能源業嘅中國能源開發（前稱漢寶龍蝦大王），噚日公布買唔成內蒙古個煤礦呢個「利淡消息」，股價即應聲跌16.54%，得番1.11元！呢間公司個聯交所編號叫易易發（228），實際係相反好易被人殺！
點解龍蝦會變蝦米？話說今年4月時，停牌7個幾月嘅龍蝦老闆大鑼大鼓話要轉型，以超過51億元入大陸開採煤炭，股價即由「靜止狀態」嘅1.23元，8個交易日就炒到最高3.7元，升足兩倍。呢味「炭燒龍蝦」可謂啱晒股民食。
仲有股評人叫上車
不過，炒咗8日又停牌7日，佢哋公布話審閱煤礦資源嘅報告要8個月（即今個月底）先搞掂，加上交易所又唔畀豁免，隨時當間公司重新上市，呢隻龍蝦又要配股抽水10億，一復牌又插水29%，得番2.5元，當時長毛質疑呢隻龍蝦嘅轉型，但有股評人竟然話龍蝦個拍檔猛料，叫人上車呢！
去到10月，隻龍蝦又借攞1000萬買澳門天然氣4成股權嚟沖喜，股價又上到1.6元頂住。噚日改埋名叫中國能源開發嘅龍蝦，卻宣布內蒙個煤礦買唔成，於是又跌！要收番1億按金都要等兩個月，分三期畀。
[email protected]