曾志偉日前主持《歡樂滿東華》時，在鄭希怡（Yumiko）空中飛褲後表示想再看多次，惹來各方抨擊，他昨日表示若Yumiko感不快，願意道歉。但他卻將自己失言的責任歸咎於拍檔好姨薛家燕不懂執生。
曾志偉和錢嘉樂昨日在觀塘出席演藝人協會年度大會，志偉對於Yumiko日前在《歡樂滿東華》甩褲，他笑言「可否slowmotion重睇」的言論，昨日公開向Yumiko道歉，志偉說：「如果呢句說話令到Yumiko唔舒服，我會同佢道歉，其他人講乜嘢我唔使理，最重要係當事人嘅諗法。」
「同家燕姐唔夾」
不過志偉認為如果當晚是肥姐沈殿霞做拍檔，情況則有別，他說：「今次件事令我好懷念做大騷嘅肥姐，我做節目永遠係直覺反應，肥姐一定會加句『作死呀，你仲講。』我同家燕姐唔係好夾，手忙腳亂，變咗句好嚴重嘅說話。通常我講錯嘢，肥姐會打我，但係今次冇人stop我，如果家燕姐講句細路仔唔好亂講嘢，就會冇事，就算係阿姐汪明荃都會講句『作死呀你』，所以大騷都係要有呢啲人鎮住。」
問志偉會否為此事作出檢討？他說：「喺街度咁大反應，覺得我係刻意去侮辱，冇辦法，我係有錯，我會去檢討，做人有嘢唔啱都會去反省，應該要有承擔，唔應該怪個節目或者無綫。」對於被容祖兒斥沒有惻隱之心，志偉說每個人也有惻隱之心，當晚他也想去慰問Yumiko，不過因有太多人圍住她，所以最終沒行動。志偉做主持一向愛胡言亂語，他強調不會因此事改作風，他說：「呢個係我作風，改咗就唔係我。」
錢嘉樂則說：「我哋動作表演冇錯，要做嘅都做晒，最重要係安全至上，件事已經過去，我唔覺得要賴邊個，唔好將責任推畀任何一個，大家都盡咗力。」
阿倫嘲永不覺悟
此外，譚詠麟（阿倫）前晚在中環出席點心衛視頻道的記者會，阿倫表示已和曾志偉通電話，指志偉改了個法號，他笑說：「佢𠵱家叫做『覺悟』，因為係日本名，前面加『永不』，叫做『永不覺悟』，係大師幫佢改㗎。」
阿倫談到新設的點心台，該台標榜新聞覆蓋範圍在珠江三角洲，歌手藝人可用廣東話接受訪問，但會否怕因此開罪無綫？阿倫說：「好難㗎，有啲嘢唔啱時代步伐，台灣電視台都變緊啦！」
採訪、攝影：魯萍、王崇穎
