又到聖誕，又到聖誕！聖誕大餐，唔食過點叫慶祝聖誕，若嫌原隻火雞放上枱唔夠特別的話？加入川菜元素的中式聖誕大餐又點睇？用花雕酒整龍蝦夠新奇未？想試新嘢就快啲訂定位，否則明年請早了！
記者︰方綺君 攝影︰譚盈傑
亮明居於今年平安夜晚的聖誕大餐，將四川的飲食風格注入傳統的聖誕氣氛內，睇睇菜式賣相，你會話︰「睇落去一啲都唔中式。」小記沒有欺騙大家，一共六道菜的聖誕大餐，每道菜都滲入中式元素。如前菜的香糟咖喱伴手撕龍蝦及蘆笋配蛋醬汁亦不弱，用做花雕的酒腳做成啫喱，一聞之下甚有中國菜風味。另主菜的火雞，放棄了傳統原隻烤焗的方法，以中式方法將火雞件炸脆，再用栗子及新鮮松茸燜煮，雖然原隻上的節日氣氛會較濃厚，不過味道和創意搭夠。$1,088/6道菜（除以上介紹五道菜外，還有甜品拼盤）
想食一定要訂位
亮明居主打川菜及南美佳餚，六道菜的聖誕大餐，主菜除了有松茸栗子扣酥火雞外，還可選擇亁貝豆酥智利白鱸魚或大千炒安格斯牛柳條，同樣好味道。加上今年聖誕有格林美音樂獎提名人HowardMcCrary的現場音樂表演及餐廳的無敵維港海景，所以每年平安夜都會全場爆滿。提醒大家最好早一星期訂位最安全，再慢吞吞好易走寶。
香糟咖喱伴手撕龍蝦
及蘆笋配蛋醬汁
一捧上枱已經酒香撲鼻，酒香來自香糟，即製造陳年花雕的酒腳，以此作啫喱，在新鮮的手撕波士頓龍蝦肉及蘆笋中散發出來。
翡翠雞茸官燕羮
表面睇，只得拂好了的蛋白平平無奇，但用羮一翻，就可看到裏面的上等官燕和菠菜茸，清湯內加入了雞茸，入口清甜滋潤。
桂花魚翅蟹箝
蟹箝下是蛋絲和四川麻辣腸粒炒翅，只有微微麻辣香味，味道一點不辣，而且翅炒得彈牙不過火，不嗜辣者亦可食。
葱管子母大蝦
以炸及葱爆兩種烹調方法，做出鮮蝦特有的鮮味，陳師傅話淡水蝦味較淡，葱爆可加入適量的味道，鹹水蝦較鮮，炸仍能吃出鮮味。
松茸栗子扣酥火雞
將火雞件炸脆伴上原粒栗子及鮮松茸燜煮，松茸是$2,000一斤的貨色，雖然齋睇確實缺少了節日氣氛，不過味道搭夠。
食神評級（以5粒★為滿分）
味道︰★★★★
服務︰★★★★
環境︰★★★★★
價錢︰★★1/2★
讚
環境靚裝修靚，又有現場音樂聽，價錢貴啲都值。食物質素穩定又常有新菜，每次來都有驚喜。
彈
將四川和南美的元素混入菜式是其特色，不過若果你口味保守少少，或者會唔啱胃口。
睇路搵食
亮明居（23933933）
地址︰中環國際金融中心2期3樓3101店
營業時間︰12:00nn-11:00pm
座位︰約160個 交通︰地鐵香港站F出口
有着數︰平安夜當晚每位賓客均獲贈香檳乙杯
