多哈亞運係近期熱門話題之一，港隊的獎牌數目（5金8銀5銅），至今已經打破98年以來的佳績，勢頭就好似股市咁，日日創新高，除了運動員本身嘅努力之外，教練嘅功勞更係唔少得。
滙豐銀行慈善基金喺過去10多年來，原來已經提供超過1600萬元，資助香港教練培訓計劃，最近社區關係經理邵亦敏（圖一後排中）去到北京體育大學（北體大），出席「運動訓練教育學士學位課程」（全港唯一的運動訓練學位課程）畢業禮暨開學禮上，向12位成績優異嘅香港學員（圖二），頒發合共4萬大元嘅獎學金。
獎學金只係鼓勵嘅一種形式，其實最重要嘅係，呢班學員將來可能成為教練，喺其專業發展上繼續貢獻香港，訓練更多體育之星，喺國際賽事上爭光。