曾經對於「『上盤』補『細』，『下盤』加『大』」，視為押注足球博彩，可擁頗大坐和望贏優勢嘅金科玉律；惟經驗過後，發現都未係最實際玩法。
所謂「『上盤』補『細』，『下盤』加『大』」，道理不難明解。以等同亞洲盤讓球半嘅「讓球主客和」博「-1」球隊贏為例，「-1」球隊要贏到1球以上，方達派彩目標，若小勝1:0，或者開個熱門1:1波膽，輸上盤都有得收番個入球「細」。
至於「『下盤』加『大』」就更實際，博得有受讓之利嘅下盤球隊，證明對下盤球隊有一定信心可以爭取到至少1個入球；下盤球隊入到波，「下盤」同「大」呢兩注，就肯定有1注收得番，仲唔係坐和望贏？
「上盤補細」？寧敲波膽
但無論「『上盤』補『細』」，抑或「『下盤』加『大』」，要兩注全收，前者只有上盤球隊贏2:0呢個戰果出現至得；後者多啲可能性，就係要望開2:2、3:3、「和其他」波膽，或者下盤球隊贏波而又要上盤球隊有入球嘅戰果。
要望上盤球隊贏2:0至有錢贏，係咁有信心，倒不如小注呢瓣「波膽」，咪仲實際？至於望開2:2、3:3或「和其他」等，呢類「波膽」一般都幾有分頭，兼取多幾瓣，最後回報率亦可能比收晒「下盤」及「細」兩瓣高得多。其實講到底，都係怕輸心理作祟啫。文：華度