傳媒大亨梅鐸昔日與老友馬隆（JohnMalone）經常一齊做刁，老友鬼鬼，點知馬隆兩年前靜靜雞買入新聞集團19%有投票權股票（votingstock）及15%無投票權股票，對梅鐸家族（擁有30%投票權）嘅控制權構成威脅，於是老友都冇得做，兩年來甚少見面，而新聞集團立即採取一啲「毒丸」（poisonpill）措施，防止馬隆嘅LibertyMedia發動敵意收購。
如澳門商場口頭禪：「沒有辦不到的事，只有講唔掂嘅數」，梅鐸與馬隆兩人，一個精，一個唔儍，喺背後叫行政人員展開談判，卒之達成協議，LibertyMedia讓出新聞集團股權，新聞集團就以30%DirectTV股權、三個地區性體育電視頻道，再加五億五千萬美元嚟交換，交易完成後，新聞集團回購（buy-back）馬隆嘅股份，等梅鐸家族嘅控制權升到36%，以後唔使再驚有其他人敵意收購，而馬隆就可以擴充衞星電視、有線電視網絡，各有所得。
梅鐸嘅新聞集團既有電視、電台，又有報紙，英美兩國都唔見有甚麼跨媒體壟斷法嚟阻止梅鐸。互聯網霸主Google打到雅虎七零八落之後，不斷擴充，與梅鐸嘅BSkyB成立策略性聯盟，喺Google播放BSB新增寬頻業務提供嘅影帶、電郵、廣告……互聯網與衞星電視結盟，香港都有，就係NOW與Netvigator，但規模當然細好多。
香港地方細，市場細，好多企業冇法子達到規模經濟（economyofscale），但如果併購多元化，會俾甚麼跨媒體法例箍住。使唔使呀！香港成日要講全球化，避免邊緣化，但係作繭自縛。唔准跨媒體，傳媒企業點會做得大呢，只會係塘裏無魚蝦自大，完全冇資格打世界波。你估香港市場有中國咁大乎？一個中移動就有幾億客戶，電盈出盡食奶力都追唔上中移動嘅零頭。跨媒體壟斷法係舊時代經濟產物，梅鐸嘅新聞集團先至係二十一世紀模式，請立法會議員唔好坐井觀天。