想過白色聖誕？唔一定山長水又遠走去東涌「阿老鼠」度啫！最近又一城開咗間食越菜嘅RicePaper；座落正真雪溜冰場隔籬，開放式餐廳，邊睇邊食零距離！最正係傳統越菜新玩西菜靚Look；仲係春卷、香茅豬扒、蔗蝦？Out晒啦！
記者：朱崇德 攝影：陳陶均
Model：KiKi、Fung
越南小屋 勁有格調
越南菜雖則有風味，不過喺香港做都係走中、低檔路線；簡單以法菜、日食一比，賣相格調差一截，真係有啲「非戰之罪」。去又一城嘅RicePaper，雕花白木門、油燈、小石磚地板！感覺摩登得嚟又帶點越南小屋風味，真係有啲計；一入餐廳先是一列20多呎長的開放式甜品水吧，睇住人煮嘢固然開心，仲有特色地道糖果小食請你食，未開飯已叫人甜在心！
搵位坐，發現近溜冰場一列座位，輕巧地4張小枱分成3、4個房間，小木門玻璃窗固然骨子，如果嚟得十零個人霸佢一間房，真係幾鬼私人PartyFeel。
Fusion賣相 勁討好
正式有食物上枱，賣相有幾分法國菜Feel，又有日菜嘅表達手法；對於食開「碟頭式」越南嘢嘅香港人，真係有幾分討好之感，而味道就相當地道！據知餐廳好多新菜，都由阿廚親身取經自越南，不如先嚟個D.I.Y.米紙卷！
原隻酸子咖喱雞$135
以重600g的春雞，用特製膠袋連黃咖喱汁同煮，汁醬完全包裹勁入味，連火爐上枱，有椰糖的香甜、鮮胡椒的香辣，勁惹味！
香茅豬肉濱海$65
以越南特產的濱海作主，將米線配以花生碎、葱油及綠冧汁做撈麵很惹味；豬肉串以香茅、蒜茸及檸葉醃製，食落香口。
空運越南大蝦米紙卷$78
想食大蝦米紙卷就要自己包，其中最特別係啲材料越南大蝦！飛機貨，食落覺得勁嫩滑！以米紙同包再加傳統「綠冧汁」（以魚露、椰糖、尖青椒及青檸汁打成）同食，酸酸辣辣甜甜勁惹味。
鵝肝米紙卷$78
形神都有幾分似日本壽司！菜底是以青瓜、芽菜、蝦米、亁葱作餡，包米紙夾綠冧汁；最後面放一塊剛燒起的大鵝肝，鵝油Fit到漏晒落去、入口味道渾然，又唔覺膩。
椰香小米糰
荔枝碎冰塊$58
呢個甜品幾有諗頭，椰青絲加椰汁都只是平平無奇，但以腍口的糯米做成小糰，椰香輕滲、入口又多了一重煙韌，面灑幾粒黃糖碎，美觀又帶點甜；再加側邊一杯荔枝味雪芭，口味多變！
食神評級（以5粒★為滿分）
食物：★★★★
環境：★★★★★
價錢：★★★★
服務：★★★★
讚
環境靚、裝修正、食物出品OK有特色，整體感覺幾OK！
彈
唯一要彈係全店設有2張吸煙枱，本是好意放在門口開揚位散煙味，可惜變相所有食客入門先「吸煙」，苦也！
睇路搵食
RicePaper（22658615）
地址：九龍塘達之路80號又一城第1層L1-20號舖
座位：180個
營業時間：上午11:30至晚上11:00