繼中石油後，中信資源亦洽商中亞國家哈薩克斯坦嘅油田項目，哈國見香港有咁多大水喉，噚日首次嚟港招商，希望吸引更多企業去投資；亦想初探香港嘅上市環境，等該國企業喺海外上市多個選擇。
哈國阿拉木圖市金融中心主管ArkenK.Arystanov話，該國約有17家企業有興趣去海外上市，已有四家喺倫敦交易所上市。而當地企業偏向選擇倫敦多過香港，因為倫交所每年都去哈國推介，佢哋對倫敦上市認識較深；對香港就唔多了解。仲有，倫敦有飛機直抵哈薩克斯坦主要城市，香港就冇。
冇語言阻隔
同一場合，港交所執行副總裁霍廣文回應話，哈國以俄語為主，唔少俄羅斯人移民歐洲，所以哈國企業喺倫敦上市語言問題較少。不過，最重要評估吓係咪適合引進呢啲企業嚟港上市，投資者係咪有興趣投資。