𠵱家收緊樓嘅將軍澳都會駅，好多業主都希望喺收樓死線前「逃亡」，蝕一成走已經大話夾好彩，部份更寧願補多少少，都唔想第日俾出名「合約精神．差價必追」嘅長實搞到惶惶終日。
世紀21魏仕良透露，都會駅本月至今已錄得大約10宗成交，其中3座高層F室，面積943方呎，啱啱以383.8萬賣咗，原業主舊年456.3萬一手買入，𠵱家蝕72.5萬，蝕幅差唔多16%。
舊年買呢個屋苑嘅人，九成以上都諗住畀樓價15%博個樓市升，點知個市跌咗，加埋長實早幾個月又劈賣二期嘅城中駅單位，搞到都會駅嘅一手買家冇晒希望。𠵱家市場有成千個單位放盤，肯蝕一成以上嘅都有超過400個盤，一時之間市場邊有咁多客去接？加上有啲客想打「落水狗」再壓價，所以成交暫時唔算多。
兩成單位估唔到價
另外，雖然長實𠵱家揼咗幾間銀行心口，但聽講最少都有兩成客嘅單位係估唔到價，惟有靠自己間尚乘財富啃晒。當然啦，就算銀行被迫或者自願估到價，佢哋對於個客嘅creditline會守得更緊，到時或者一樣有好多人借唔夠錢而要倒貼上會㗎。