歐協盃今個周中就上演最後一輪分組賽，以近兩屆歐協盃分組賽從未有一隊可以4戰全勝，今周一於捧之前已3連勝嘅熱刺同帕爾馬斷纜，博佢哋贏唔到。牽牛
唔經唔覺歐協盃改制增加分組賽已經踏入第3屆，由於賽制特別，分組5隊採單循環制，頭3隊又有得出線，搞到上兩屆都傳過「假波」疑雲，足智彩都試過唔開盤；睇番呢兩屆分組賽往績，竟然冇一支球隊，可以4戰全勝攞足12分；今屆仍然有3隊向全勝紀錄邁進，就係愛斯賓奴、熱刺同帕爾馬，愛斯賓奴主場對奧地利維也納，對手實在太弱，似乎拗頸唔過，所以就推介大家博熱刺同帕爾馬對家。
熱刺勢留力英超快車
熱刺主場對布加勒斯特戴拿模，熱刺係就係有決心攞B組首名出線，不過細心睇，今次只要主場賽和已經7分嘅布加勒斯特戴拿模，都一樣可以首名出線啫；領隊祖爾會唔會搏盡贏波？熱刺表面上主場甚惡，不過個走勢已經開始下滑，前仗主場靠羅比堅尼射個「蠱惑波」，先可以擊敗米杜士堡，上周六對住護級嘅查爾頓贏5:1好似好勁，但只不過對手散晒啫；加上熱刺中前場都幾多傷兵，羅比堅尼、贊拿斯都要1月先復出，嚟緊英超聖誕新年加開快車，祖爾再承擔不起更多傷兵，悶和對手一向係祖爾強項，一於博「客勝」啦！
帕爾馬護級大過天
帕爾馬喺意甲聯賽跌到榜下游，不過打歐協盃又出奇咁醒神；帕爾馬足協盃3戰全勝，唔單止出梗線，更加肯定係D組首名，在情在理，今仗主場對奧沙辛拿，都冇搏老命贏波必要，都係留力聯賽護級好過啦！不過奧沙辛拿處境又好微妙，只要攞多1分，就肯定出線；不過大家要留意歐協盃32強抽籤賽制，分組賽首名會對其他組第3名，分組賽次名就會對歐冠盃第3名，係人都知歐冠盃球隊勁好多，奧沙辛拿應該唔想作客攞3分，無端端變成D組次名；帕爾馬話晒主場，都要向球迷交代，雙方和氣收場，都係合理戰果。
投資特攻隊金句
熱刺中前場都幾多傷兵，羅比堅尼、贊拿斯都要明年1月先復出，嚟緊英超聖誕新年加開快車，祖爾再承擔不起更多傷兵，悶和對手一向係祖爾強項，一於博「客勝」！