散戶為增加投資回報絞盡腦汁，在網上討論區，有網友打長揸嘅股票主意，考慮向銀行抵押股票借貸再「錢搵錢」。網友wmh52喺《香港討論區》問：「本身有8000股中銀香港，市值約15萬元，如用嚟做抵押問銀行借3萬元買高息外幣，分18個月還，利息係咪平啲？」
wmh52積極為資產增值嘅態度確實值得欣賞，但係抵押股票借貸再去投資，成本重，並唔化算，隨時賺埋唔夠畀息。本報向恒生銀行查詢，抵押股票貸款額最多為股票市值五成，利息係最優惠利率（P＝7.75厘）加2厘至2.25厘，即利息最少要9.75厘，勁貴！即是說，投資回報要達9.75厘先打個和，押股借錢投資絕對制唔過。
私人貸款更低息
與其押股借錢，不如利用私人貸款，成本較抵押股票貸款仲要低。如透過免息貸款借3萬元，每月定額手續費0.55%，相當於年利率6.6厘。而且，向銀行抵押股票後，股票被鎖住不能隨意買賣，可能得不償失。