近期本土嘅高科技行業都唔多掂，業績倒退唔在講，連股價都插水，令股民慘上加慘。
噚日德勤公布亞太區高科技高成長500強公司，過往3年嘅平均收入增長近四倍，頭5強增長近68倍，排頭位嘅台灣益通增長高達83.5倍，成績驚人；第2位嘅台灣易連都唔輸蝕，增長71倍，咁啱兩家公司都係做半導體、電子及元器件。對比本土公司嘅幾十巴仙增長，真係蚊同牛比。
增長咁強勁，班高層有咩妙計咁掂？易連主席兼CEO戴譙彥就答得非常妙，話實行汰弱留強制，佢將員工喻為樹幹同樹葉，樹幹即係台柱，冇咗佢唔得嘅員工，樹葉就係被out出嚟嗰班。
易連戴譙彥妙語
問佢會唔會請港人打工，佢又好妙咁話，香港主要做地產，加上佢哋基地喺台灣，所以請唔請港人仲評估緊。睇嚟港府都要諗計催谷其他有前途嘅行業，以免其他投資者以為香港淨係得地產一行。