臨近年尾，打工仔最關心就係公司來年有冇人工加，咁滙豐、恒生、國泰以至新地，都講到明話明年人人有人工加，華華都戥佢哋開心，不過有人歡笑有人愁，亦都有企業話到明冇得加，邊間？就係今年股價同業績屢創新高嘅港交所！真係估佢唔到。
話說上個禮拜四，港交所（388）行政總裁周文耀響公布3年策略計劃嘅同時，要求佢啲同事改變吓思維，改變交易所往日官僚文化，從今起要走商業化路線，要以客戶為依歸，快啲推出更多啱市場口胃嘅產品，仲話以後港交所會實行責任制，推行優秀員工獎勵計劃，一於將薪酬與表現掛鈎咁話。
員工獎勵計劃補數
言猶在耳，華華聽到一個消息，佢哋董事局已決定，1到3級高層明年一律凍薪，至於3級以下嘅職員，會視乎表現決定有冇人工加。唉，原來並唔係業績創新高就有人工加㗎！
雖然消息人士唔肯話畀華華知，今次慘遭凍薪嘅人數，只係話但凡部門主管級都列入1至3級高層範圍。據華華翻查港交所中期業績，佢哋截至6月底總共有員工833人，其中臨時工44名，按港交所網站個架構圖，喺圖上邊有名嘅人共有29個，唔知係咪就係佢哋冇人工加呢？
之不過，周總裁話同時會有優秀員工獎勵計劃推出，咁呢批高層咪勤力啲，快啲推行策略計劃，等港交所真真正正躋身國際金融中心（原來我哋集資額喺11月底又俾美國追番上嚟，只係排喺第3位咋！至於市值，因為美金縮水，𠵱然只企喺第8位），咁咪肥過肥仔水囉。
[email protected]