網友「廣告設計號AdGallery之暗巷點燈」經常將啲幾正嘅平面廣告，擺上個blog度同大家分享，最近佢登咗一系列三張，美國銀行在海外推廣網上服務嘅戶外廣告牌照片，其中一張平面廣告嘅口號係：「Thinkaboutit.Youarelickingglue.Paybillsonline.Free.」（中文繙譯嘅大意係，要記着你正在舔膠水（貼郵票時）；選擇網上繳費，費用全免）。
呢個廣告嘅幽了客戶一默，讓人留下深刻印象，呢位網友認為，將billboard設計成為巨型白式信封嘅意念惹人喜愛，但係美國郵政服務就唔會鍾意喇。雖然客戶透過網上交費係免費，但美銀仍然願意落本做廣告推廣，可見客戶服務真係好重要，即使美國銀行係全美首要嘅個人銀行，都要面對現實！
香港分行亦推優惠
香港嘅美銀（亞洲）早前被建行（939）收購咗，但發展策略仲未有變，不過，原來一個星期多前，佢哋開始推廣17項免費「電子提示服務」，只要去佢哋嘅電子理財服務網頁（www.bankofamerica.com.hk/chinese/personal_banking/find_out_more/eAlert.html），填妥資料及列印「電子優惠券」，就可以去佢哋嘅分行攞部「電子發聲計步器」，即使非美銀亞洲客戶都可以領取，但係數量有限。
美銀亞洲話，登記咗用「電子提示」服務嘅客戶，未來3個月內都可以免費使用電郵及手機短訊提示，提示項目包括：所有成功於各地ATM提取現金的交易、定期存款到期、所有於網上完成的預設繳費等項目，不過美銀亞洲話，之後要唔要收費就屆時至知。