民安控股每手入場費僅為3.798元？！
華華噚日翻開民安本招股書，見到第214頁寫到：「…閣下必須就每手2000股公開發售股份支付3.798港元。」4蚊雞都唔使？華華當堂打咗個突，覺得好兒戲，點解冇人對吓本招股書就出街？同一內容嘅英文版本就冇錯，寫明係「HK$3,798」。有時，一個標點符號不同，差距可以有近1000倍咁多。
瑞信要檢討
12月份多間公司排隊上市，都係想趁住呢個熱潮啫，但唔知係咪太急，搞到忙中有錯。其實，民安本初步招股文件，已經試過寫錯嘢，盈利預測下跌55.4%寫成「下跌124%」，盈利跌幅竟然可以超過100%！寫呢份文件嘅律師行同保薦人瑞信，真係要檢討吓啦。