「萬人迷」碧咸嘅招牌式罰球前晚難得重現江湖，可惜皇家馬德里最終都1:2不敵西維爾，難得佢入波立功但隊波都輸，睇嚟佢喺皇馬嘅日子都係氣數已盡喇！話時話，有傳佢有可能重投曼聯，而出年3月返奧脫福踢表演賽，最好就趁呢個機會睇吓球迷反應嘞！
代表明星隊出賽
西維爾主場不嬲係碧咸嘅福地，今次佢開波12分鐘就喺對方右閘位射罰球，直接彎入遠柱，兼破兩個幾月入球荒！可惜皇馬最後都輸番1:2。記得上季聯賽作客西維爾，碧咸又係入「首球」之餘更梅開二度，可惜隊波最終輸3:4，同樣係嘥咗萬人迷一番心血。
碧咸入波，相信日前話希望佢留隊嘅會長卡達朗會更加瞓唔着；因為自己雖然想挽留碧咸，但係硬頸教練卡比路又似乎唔多鍾意對方。真係左右做人難呀！
另一邊廂嘅碧咸就繼續睬皇馬都儍，畢竟自己仲有番咁上下江湖地位。近日歐洲足協宣布為慶祝《羅馬條約》簽署50周年，明年3月13日會喺曼聯主場奧脫福舉行表演賽，由曼聯對歐洲明星隊，到時碧咸就會代表明星隊上陣。呢隊歐洲明星隊將由前意大利國家隊教練納比執教，咁蹺佢同碧咸都被傳可能加盟曼聯，咁明年3月到訪奧脫福，如果見球迷熱情，不妨咪考慮下加盟曼聯囉。
「今次碧咸入波，皇馬最後都輸波，真係唔知邊個累邊個喇！好耐都無見碧咸喺奧脫福出現，出年3月場波值得期待。」