由於超大現代（682）主席郭浩啱啱響11月28號個股東大會昭告天下，話現階段冇計劃批股，但係上個禮拜五開市前竟然有一單大手6000萬股上板，每股作價4.63元，金額達2.78億元，即刻引來主席冇口齒疑雲，於是股價愈走愈低，搞到幾乎以全日最低位收市，收報4.57。
由於最近市場焦點放晒喺新股度，華華原先亦唔為意，幸獲高人同事提水，話超大啲股份係由大摩做中間人批出，但派貨者唔係早前減過磅嘅金手指V記基金，亦唔係主席郭浩。坊間傳聞，貨源可能來自前郭太！
前郭太兩年前辭退
最令華華出奇嘅，係趙娜麗女士原來已經變成前郭太，唔怪得早喺04年9月，前郭太突然以大陸最流行嘅「健康」做理由，辭鬼咗個董事職位啦。又唔怪得舊年2月4號嘅時候，佢突然同郭浩分開申報喺超大嘅持股量，當時，市場曾以為郭浩想批股而事先作出安排，原來係……
嗰次亦係前郭太最後一次申報持股量，當時伊人持有4.46%超大股份，當日收市價3.2元，批股份市值3.36億銀。之後超大股價飛升，今年3月底衝到去6.1元，連郭浩都忍唔住批舊股套現，超大亦發CB吸水，但股價自此載浮載沉，上周五上板嘅6000萬舊股，相當於持股量2.54%，大約等如伊人最後申報嘅一半。如果呢批貨真係前郭太嘅，咁都算好有情義啦，事關佢並冇同郭主席一齊掟貨，而係等股價穩定咗至咁做。
[email protected]