歐洲冠軍球會盃打完初賽，十六隊進入第二圈淘汰對抗賽，今個星期五抽籤，由各組第一名對各組第二名。英超四強曼聯、車路士、阿仙奴、利物浦因同係小組第一名，肯定唔會在第二圈碰頭。
因為英超球隊咁巴閉，令歐洲球評家產生一種意見，英超聯嘅實力，歐洲第一，即係世界第一。嗱，十六強之中，英超四隊，西甲三隊，意甲三隊，法甲二隊，德國、葡萄牙、蘇格蘭、荷蘭各一隊，你話英超係唔係最醒呢？意甲本來最財雄勢大，但今季受假波打擊，祖雲達斯降落乙組，球迷冇癮，離開球場，AC米蘭對里爾，球票大減價，只收一歐元，都吸引唔到球迷，成個球場只有二萬二千人，入座率係三分一，可算十分慘淡，今季意甲觀眾星散，同英超球賽啲現場氣氛差得遠咯。德甲因為冇大水喉，班霸拜仁慕尼黑都留唔住啲球星，法甲亦然；反而啲大財主鍾意收購英超球會，麥通酋長財團預備以四億美元入股，水皮球隊韋斯咸都有財主收購，英超嘅銀紙大把，明年歐洲大陸啲球星，當以英超為歸宿。但有一樣弊，英超大球星一年踢波踢到尾，球會喺歐冠盃成績愈好，比賽愈多，好易踢到殘，好似亨利咁，已經身心俱殘，須要休息一個月，亨利喺○五年球季開始，一直冇停過，替阿仙奴、法國上陣六十幾次，場場做進攻主將，真係鐵人都捱壞；佢哋係球星，亦係球會、國際足協嘅搖錢樹，國際足協會長白禮達無視於此：竟然建議歐洲劃一球季，夏季照踢，到咗十月就到國家隊上陣踢盃賽、友誼賽。白禮達知唔知道珍惜球星球員㗎，佢哋唔係人造機械人，而係人，有血有肉，可以受傷，識得痛楚與心理負擔嘅真人，點可以一年到尾都踢波呢？美式足球球員衝撞激烈，每球季只有五個零月，放假與集訓時間多過上場，與美式足球相比，歐洲足球員辛苦好多，左丁山雖然係超級球迷，都不忍一年到尾睇住亨利踢波。