發展商為求賺到盡，新樓實用面積每況愈下，有啲低到得七成，但發展商又想營造到地方好見使，500平方呎單位點都要間兩間房，搞到啲房迫迫夾夾，擺完張床擺埋衣櫃，分分鐘要深呼吸縮肚腩先入到房。
網友DT1025對呢啲大肚婆想轉身都難嘅房仔好有意見，佢響《香港討論區》話：「新樓實用率咁低，發展商係咪應該只間一房好用啲呢？起碼少啲牆，少啲柱。」不過echoes話，得一間房都好唔方便，「得一間房好難儲物，二人小家庭要兩房都係要用一間房放雜物同擺書枱，得番一個房都唔知雜物點放好。」
儲物問題最頭痛
講到儲物問題，smugdull就發晒火：「啲房細成咁，買家具都好難唔訂做！起碼個窗台都會變成家具一部份！或者間房要加高個地台用嚟儲物！」kwokfung就暗寸發展商：「過多幾年如果啲新樓實用率係30至40%，係咪應該唔好間房，房同廳打通埋佢呢？」
fatfat60呼籲大家要站起來，聯手對抗發展商：「點解香港人咁逆來順受，任由發展商魚肉，唔通我哋真係咁犯賤？如果我哋可以齊心杯葛唔買呢啲縮水樓，發展商就唔會咁離譜。」睇番𠵱家啲新盤愈賣愈細、愈賣愈貴，就知道好難同發展商鬥啦！