港股上個禮拜五跌勢喘定，同日美股亦靠穩，如果今朝早㗎仔個市生生性性造好，港股應該可以反彈，雖然10日線跌緊落嚟，恒指升上18850嗰頭已經會有阻力，但係大市靠穩，就可以刺激番短線嘅炒賣氣氛。
呢個禮拜嘅市場焦點有兩個，一係美國聯儲局議息，雖然大家已經預咗唔加息又唔減息，但係會後嘅聲明就好重要，因為佢係大戶搵炒作藉口嘅地方；二係美國成班高層飛到北京「講數」，話就話係拜訪，其實就係講吓人民幣應該點升法，無論係姿態定係實際方面，美國都會迫人民幣升值，美國出到財長加聯儲局主席咁嘅組合，點都唔會空手而回，就係呢個原因，炒人民幣升值嘅活動就變得更加熾熱。有讀者問俊樺，美元正在貶值，人民幣自然升值，點解仲要迫人民幣升快啲、升多啲？呢個問題可以好複雜，但係喺簡單嘅層面睇，其實都可以睇到啲核心嘅嘢，美元貶值，係對所有嘅貨幣嚟講，如果人民幣兌美元升值，美元嘅貶值只係對人民幣嚟講，涉及嘅層面同利害關係就完全唔同嘞，大家明未？
恒生C輪1318：恒生（011）上日報收104.30元，企喺條10日線好穩陣，20日線又升緊上嚟，唔理滙控（005）俾人質，睇嚟仲會持續強勢，如果滙控掉頭升，恒生個勢應該會仲強。恒生短線睇上試108元，破位可以睇112元。
恒生C輪1318上日平收39仙，仲有109日先到期，負溢價0.4%，睇啱正股嘅方向，好抵賭，槓桿率26.7倍（有效17.4倍），對沖值0.65，正股升上108元，1318應該唔會低過60仙，正股升上112元，隻C輪應該逼近90仙，呢個價買啲，正股跌穿102元止蝕。
俊 樺