無論上市公司抑或中小企都講求企業責任，商家喺賺到盡嘅同時，都要回饋社會，為大眾出番啲力。中糧集團主席寧高寧日前喺《中國企業家》主辦嘅企業領袖年會就有一番獨特見解。
寧高寧話，𠵱家班有錢佬爭住捐身家，一盡企業責任，美國BillGates捐，香港超人又捐，但係佢就打譬喻話，捐身家屬於老人家嘅行為，喺急速發展中嘅中國，就好似一個小朋友咁，要慢慢學盡責，絕對唔急得，要逐步去學習承擔企業、社會同民族責任。盡企業責任嘅第一步，就係要將產品同成本控制做好，先至可以同全球競爭，盡更多其他嘅企業責任咁話。
華華覺得，盡企業責任好簡單，只要豉油商唔好加入黑頭髮，雞蛋商唔好混入蘇丹紅，腐竹商唔好倒入漂白水，就已經等如有半隻腳踏入全球市場喇。