廈門大學建造高爾夫球場，將高爾夫球列為必修科，好多人因而嚇咗一跳，中國承認人民收入分佈不均，貧富懸殊程度，屬世界最嚴重級別。既然係咁，一間大學鼓吹富人玩意，似乎不合國情，但以中國現實嚟睇，學生學好高爾夫球，有必要噃。
銀行中國區總管Ｙ老兄主持中國業務，大大話話超過二十幾年，由參加廣交會、搶東方賓館房間開始，至到今日中國擁有儲備一萬億美元，大城市城開不夜嘅盛況，賓架Ｙ對中國業務嘅經驗，十分豐富。佢最近對記者Ｇ講：「邊位年青人想做中國業務，到大陸闖天下，今時今日要擁有兩項技能與資格。第一就係碩士學位，學士唔夠照，第二係兩文三語，廣東話麻麻哋，唔緊要，普通話唔掂，你愛咯，當然要識睇中文字啦，唔識就似盲公，第三就係高爾夫球，打得愈叻愈好，𠵱家內地中央政府官員、民企高層好鍾意打高球，我哋嘅職員唔識嘅話，點埋到身？打一場波，兩三個鐘頭，有好多嘢好傾，成為波友，就無所不談，生意就是這樣做成的。」
曾特首話過打波冇用噃，在更衣室沖涼之時先至有幾句嘢傾吓。賓架Ｙ話：「曾特首咁高貴，又少打波，如果去打波，梗係講吓官話啦。我哋就唔同，冇高爾夫球唔掂㗎。」咁講法，香港啲大學生咪好蝕底？有幾多個識打高爾夫球呀？廈門大學大概做過市場調查，為咗培養學生求職技能，增加自豪感，故此要開設高爾夫球場，如果肯出錢搵埋老虎仔活士做設計，就更加威猛，會拋離香港啲大學幾十個馬位。為咗保持競爭力，香港啲大學不如將體育必修（一個學分）擴展至高球，將校園內運動場當作臨時drivingrange，作為上課場地，再去公眾高球場做實習，畀夠兩個學分又點話！
高爾夫球興起，搞到其他曾經興旺過嘅壁球、桌球冇啖好食，網球亦下滑，唔少室內壁球場嘅使用率好低，紛紛改作乒乓球，小型籃球場，呢個現象是否健康，請社會學家研究吓。