今日，孫柏文首先要多謝《利字當頭》一欄總舵主利世民兄，過去兩日「出山」寫咗兩篇關於宏觀貨幣政策嘅文章。小弟特別對世民兄點睇人民幣最為佩服，一句：「只要一天人民幣不能自由兌換，就代表了人民銀行暗地裏明白，滙兌市場開放的結果將會是人民幣下跌。」就能道出自由浮動嘅人民幣應該會走的方向。
呢幾日，因為我知道自己罪孽深重，所以為求查找不足，決定閉門思過幾日。令我覺悟自己罪孽有幾深嘅，就係好多痛罵本人嘅網上討論區。孫柏文發覺原來我有一個超級大fan屎，網名叫kellygun，相信佢一定係出於一個恨鐵不成鋼嘅心態，喺全特區各大網上討論區發起多個「倒指」討論，討論標題仲要好有心思。
早排隔籬版《英之見》一欄總舵主，孫柏文非常敬仰嘅黃國英兄，曾經呼籲喜愛討論財經口水佬表現嘅網民：「網上輿論也極有影響力。其實網上批鬥，只會增加人家（財經口水佬）的無形壓力…最後可能只剩少數應聲蟲點綴。」仲有，黃國英兄仲話：「（口水佬）睇好睇錯根本無所謂，賭場黑氣石也有價值。」
而經過幾個月前，孫柏文建議大家買熊證繼而輸清光嘅沉痛經驗之後，網民就開始叫小弟「黑氣石」Kryptonite。如果大家有留意花旗國漫畫，超人Superman嘅弱點，就係一遇到「黑氣石」會超能盡失。無獨有偶，因為小弟喺兩個禮拜前曾經叫過大家「一注獨贏買和黃」，仲要話會升到100元一股，所以就引發好多「李超人遇上股壇黑氣石孫柏文，和黃會唔會大跌呢？」之類嘅討論標題。和黃今日未大跌，黑氣石未靈驗，孫柏文亦希望唔靈驗。
講起查找不足，我不能不提周末甩褲嘅Yumiko，同埋早排被人「偷吻」嘅官恩娜。佢哋兩個人一路都未能大紅大紫，原因其實好簡單。今時今日，觀眾最想見到藝人有最稀罕、最有價值嘅特質，就係要真honesty，同處變不驚toughness。見到Yumiko喺事件發生之後第二日，喺電視螢幕上喊，仲話因甩褲所以取消工作，真係會令年輕人覺得佢又假又廢，咁樣點會紅？
試問，如果當時Yumiko即刻展示燦爛笑容，用番幾年前fornari牛仔褲廣告裏面女主角咁着番條褲，仲要話再試跳，直至到成功為止，你估TVB唔會將節目改名做「歡樂滿Yumiko」咩？幾年前，環球小姐冠軍，現今係地產代言人JenniferHawkins，都試過公眾場合甩褲，佢又點做？好有性格咁，向觀眾微笑。
官恩娜仲弊，話被人「強吻」令佢精神崩潰。有幾崩潰？有線電視即場訪問佢嘅時候，仲記得用普通話做對答，喺被人嚴重非禮之後，仲記得謹守無線電視不明文「行規」，豈能唔覺得佢又假又廢呢，咁樣點會紅？