臨近聖誕及新年，唔少人都會趁機買禮物送畀摯愛親朋。以前買禮物要周街逛，但家陣科技發達，唔少消費者都寧願上網shopping，費事出街同人迫餐死。
美國全國零售商聯盟（NRF）話今年網上購物消費會有明顯增長，Bized就喺《MSNBC》嘅討論區問網友網上購物情況，同埋請教點樣搵到筍貨。
唔少網友都回應話網上消費確比以前大增，主要原因係方便。fyrdanser留言話：「除咗唔會上網買衫（因為冇得試身）之外，佢大部份嘅節日消費都喺網上進行。」佢會先透過網上搜尋器如Google搵晒有關物品嘅網上零售商出嚟，順便格埋價。如果網友想買獨特嘅產品，又或者市面難尋嘅物品，fyrdanser建議上eBay碰碰運氣，但就要打醒十二分精神，小心被無良賣家呃錢。
交易欠安全感
Bryda亦認同，商舖趁節日減價或搞優惠促銷，間間舖都人山人海、水洩不通，購物樂趣亦大打折扣，相反網上消費有時會有免費送貨服務，夠晒方便。不過，LorenaBobbit就話網上交易冇安全感，好怕個人資料外洩或被人盜用。
事實上，科技發展的確改變咗唔少人嘅消費模式同習慣，據美國市場研究公司ComScoreNetworks報告指出，感恩節假期後嘅《網絡星期一》（CyberMonday），網上銷售額達6.08億美元（約47億港元），比去年同期增26%。報告又指出，預計年底前嘅節日網上零售額將達243億美元（約1900億港元），較去年同期增24%。