遠東發展（035）市值50億元，旗下兩大業務，內地地產業同本港酒店業，未來幾年肯定可以提供豐厚收益，以每年盈利估約6億元計，預測PE只係8倍多，同同類股比較，股價實在大落後。
內地房產股今年氣勢如虹，傳統大紅籌中國海外（688）同華潤置地（1109）都創出歷史新高，越秀投資（123）同北京北辰（588）亦創出97後新高；新上市的雅居樂（3383）同世茂房地產（813）更加係一浪高過一浪，反而在內地已擁有大量土儲，而未來幾年又肯定可以賺到笑嘅遠展，近幾個月股價仲係在窄幅徘徊，現時股價仲遠低過今年4月的高價4.15元。
遠展物超所值，吸引到基金持續在市場收集；上個月，PentaInvestment就出動3次，合共購入2179萬股，平均價由3.44元至3.51元，令持股量上升到16.14%，至於有吸納而持股量未需公布的，相信亦有不少。
基金現水平仍大手買入，後市睇幾多？以保守的賺50%計，遠展股價可見5.25元。事實上，遠展經長達半年的圓底收集後已去到破位而上邊緣，由於MACD快將出現雙牛入貨訊號，一衝破3.57元，而又有超過1000萬股的大成交支持，中期上升大浪即可確認，照度上去，初步上升目標係4.40元。
遠展在上海、廣州同成都等大城市都有開發項目，單係上海的加州花園，計劃在5年內發展完成，全部售罄，可賺30億元，每年可分到6億元。
有分拆REITs概念
仲有，遠展已計劃在加州花園興建一個100多萬方呎的大型商場，以配合明年地鐵站啓用，以20元呎租計算，每年又可增添3億元的長期穩定收益。
再講本港酒店業務，遠展現時係三四星級酒店大王，旗下7間酒店有房間2300間，年租金超過3億元，相信明年分拆REITs上市時，股價升勢又添新動力。
郭兆誠