娛樂圈女星整容傳聞一直傳到天花龍鳳，不過除咗裝完又拆嘅樂基兒認過隆胸之外，冇乜人夠膽認。繼早排模特兒Lydia做咗整容公司代言人後，噚日變靚D就話請咗全香港第一個整容明星任代言人，喺佐敦搞咗個記者會，擺明就係想整容大眾化。
未諗隆胸
老闆蕭定一噚日請咗3個韓國抽脂同隆鼻專家到場，搞咗一輪先宣布整容代言人係吳文忻。身為98年港姐季軍嘅吳文忻話反正成日都俾人話自己整過，不如大大方方企出嚟去整咁話，佢又話唔多滿意自己個鼻唔夠高，仲會打肉毒桿菌入下巴喎，不過就唔會走去僭建隆胸。吳文忻話去韓國整容手術雖然短短個零鐘，不過事後要休息3個禮拜。
蕭定一就好大方承認因為減肥行業競爭好激烈，所以就引入整容旅行團，帶大家去韓國實地視察，佢透露今次吳文忻嘅酬勞加埋整容費用，總共七位數字，除咗吳文忻之外，遲啲仲有兩個代言人會現身。
