稱得上「打工皇帝」嘅傳奇人物，原來真係唔憂做㗎！《新浪網》引述消息，有傳「打工皇帝」兼前用友軟件CEO何經華，將會過檔用友嘅死敵金蝶軟件做CEO，實行挫一挫現任用友主席兼CEO王文京嘅氣燄。
02年，王文京用500萬人仔，重金禮聘何經華由宏道跳槽到用友，做咗CEO三年未到連合約都未滿，何經華就黯然離職，當時傳聞就話王文京嫌何經華成績麻麻，對佢唔多滿意。
舊年7月何經華去咗希柏系統軟件擔任大中華兼東亞區總裁，後來間公司俾佢前前度老細甲骨文收購埋，做到今年2月，佢又劈炮唔撈。一直沉寂咗大半年，先至傳出話佢會去金蝶做CEO。金蝶主席徐少春請到何經華助陣，正面迎戰王文京，兩大風雲人物相遇，相信軟件市場會掀起新一輪競爭。