飲咖啡！大家都係由意大利起家，Cappuccino、Espresso邊款未飲過？灣仔新開嘅caffeHABITU，食物、裝修，甚至細微至咖啡豆，都力Sell香港罕見純意式風味；佢仲從意國引進最新「熱溶朱古力」沖咖啡，仲話明香港只此一家，第二處一定飲唔到！
記者：朱崇德
攝影：陳盛臣 Model：Irene
鍾意逛咖啡店！除咗為鋪癮，嗰份Hea住坐嘅閒適感覺，亦係令人上癮原因！初抵caffeHABITU，紗窗、小吊燈、皮梳化、木枱櫈，配襯在地上黑白小瓷磚拼砌的圖案，真係有陣簡樸嘅歐陸小鎮風采！認真數數，2,200平方呎樓面，只有50個座位，以灣仔鬧市，喺度Hea咖啡，仲有種為老闆肉赤嘅奢侈快感！
有別於其他連鎖式咖啡店「工廠式」食品，呢度有焗爐有廚房做自己的食物，意籍行政總廚MarcoFurlan話：「細至一粒番茄，我哋都用意大利貨；常用如意粉或千層麵，我哋都要自己做！而且今次介紹嘅食品都係今冬最新Menu。」不得不提係呢度嘅咖啡，係香港罕見使用純意大利出品，仲俾知名拍賣公司蘇富比評為「無懈可擊ExpressoCoffee」的ATT；記者咖啡年齡雖淺，初上枱雖冇美式咖啡濃香的震懾香氣，但入口甘純，咖啡味清而不濁，酸味亦較輕，幾易入口，最喜歡是飲後有種生甘的尾後感，飲過好多咖啡店都好難有呢種感覺。
CIOCCOLATA BICERN$36
呷第一口，做乜整杯「熱溶朱古力」加鮮忌廉我歎？原來秘密是在銀壺仔上，只有「半指」深的Espresso咖啡；一倒下去，完全變為一杯香味四溢的Espresso溝朱古力忌廉！一杯嘢竟有兩種飲法。
熱溶朱古力有乜咁正？
純意大利血統「熱溶朱古力機」，香港僅此一部！較一般Cafe以朱古力漿/粉的分別，是把朱古力維持40餘度，令味道幼細嫩滑，而且同咖啡溫差小，亦令咖啡保持最佳熱飲溫度。
AFFOGATO$48
以腍軟細滑的意大利Gelato雪糕，熱撞特濃的Espresso咖啡；食落有啲似食甜品，又有點似飲緊一杯非常稠口的咖啡，唔使落糖，已經有種甜入心之感。
ZUCCOTTOALLA SICILIANA$38
以朱古力海綿蛋糕夾雜意式亁果粒，意式風味出晒嚟！糕面、糕底分別熏上橙酒及杏脯酒，果香感更濃烈；糕面粗抹了一層微焦的蛋白、糖漿，感覺有如吃下一件藝術品。
TRADIZIONALE$50
看似簡單的芝士千層麵，但麵皮竟是細心自家製，比一般用半製成品貨色的新鮮細滑好多，食落仲有淡淡麵粉芳香；而且佢仲糅合了北意、南意的羊牛混合式做法，去到意大利都未必食到。
AL4FORMAGGI$58
起用Provolone、BuffaloMozzarella、SmokedMozzarella、及Gorgonzola製成了純芝士風味薄餅，滙集了幼滑、粗獷、香氣及濃稠味道於一身，餅底只有2mm，入口脆到卜卜聲。
BRUSCHETTA$48
以烘焙的蒜茸包作底，面上鋪放鮮甜的意大利小番茄，再加香草、香葉及橄欖油，吃在嘴裏已一口鮮；此外三件包食中，仲各自放有意大利鹹魚、烤黃椒及烤茄瓜，鹹、香、辣、滑，變化風味萬千。
食神評級（以5個★為滿分）
食物：★★★★
環境：★★★★★
價錢：★★★
服務：★★★
評語：整體感覺唔錯，試完菜都想搵日偷雞上去Hea！不過留意Menu菜名全「意大利英文」，點菜有啲估估吓；拍攝當日隔籬枱就有位行政Look哥仔，因睇唔明份Menu又冇食物相，因而指住我影緊嘅菜叫，慘！
搵食攻略
caffeHABITU（25278999）
地址：灣仔皇后大道東8號先施保險大廈地下
座位：50個
交通：金鐘地鐵站F出口，沿軒尼詩道往灣仔方向行5分鐘。
人均消費：$90-$150