一向知慳識儉嘅嘉寶好開心咁同我講，佢用開嘅某牌子消毒洗手液平時賣得貴過普通梘液好多，點知今日俾佢喺展銷場見到有大減價，即時掃咗一大箱，今次有排用。不過我就唔明，點解要特登買嗰隻消毒洗手液，用普通梘液咪得囉，一樣啫，價錢平啲，又唔使等大減價先掃貨！
嘉寶即刻歎口氣話，𠵱家呢個世界咁多菌、咁多病毒，用有消毒成份梘液先可以殺得清啲惡菌，冇咁易病。不過，我翻查過美國FDA（食物及藥物管理局）講過嘅嘢，話其實嗰啲聲稱可以消毒或者含抗菌成份嘅梘液，功效都係同一般番梘冇分別，就算用咗都唔代表可以特別減低被傳染病毒嘅機會。如果你隻手黐咗啲病毒，就算用咗消毒梘液，但洗手洗得唔夠耐，一樣會中招！
所以最重要係洗手洗耐啲，一定要捽到起泡，手指、指甲、手掌、手背都要洗亁淨，咁先可以發揮到清潔功效，如果你只係捽兩捽，就算用最名貴嘅消毒梘液都係嘥錢咋。
逢周一至周四刊出