上星期六講過手機電池商都有3G概念，同埋光宇國際（1043）縱向生產嘅成功故事，今日有隻手機充電電池生產商飛毛腿集團（1399）招股上市，假如以上限價2.02元計，呢隻飛毛腿市值17.3億元，低過光宇嘅21.4億，預測06年PE約12倍，都低過光宇嘅20倍，但係去年營業額得7億元人民幣，遠低於光宇嘅12.5億，PE所以咁低，相信係因為毛利高。點解咁高，歐陽風都要時間詳細研究一下。
人民幣升值令一眾內地房地產股長升長有，上星期輪到一隻另類內地房地產股合富輝煌（733）發力，上周五升逾6%，股價升穿今年5月同10月的雙頂阻力，破頂而上。
合富主要喺廣州提供綜合房地產代理服務，上半年國家實施宏調措施，集團上半年營業額仍然大幅上升77%，至1.99億元，純利則升47.7%，至3440萬元。
合富一向有基金睇開，除咗惠理基金揸貨逾11%之外，今年10月初宣布以先舊後新方式，按每股2.85元，向ArisaigGreaterChinaFund配售2750萬股，集資7650萬元，連同之前持貨，同埋上個月繼續增持，現時持股已增至11.14%，已經多過惠理，成為第二大股東。配股畀基金後，合富橫行成兩個月至開車，圖表剛呈突破，可吼位搭返轉順風車。
歐陽風